Katie 成長日記

前幾日SAM苗媽講我知今期BABY-MO見到KATIE蹤影，即時走去買本黎睇下啦 , 原來係登左係成長日記欄 ,11-12個月既HAPPY SMILE 代表..哈哈! 對我黎講都好特別..係KATIE生日月收到本書 , 又可以做個紀念!!

韓國生日會 -- 爺孫小玩意

Katie 成日去廚房攪雪櫃 , 爺爺用呢個方法運送佢出廳..超攪笑..korean style..金先生細個都好enjoy咁玩喎..

又黎生日會?

無錯! 又係生日會丫..不過今次既主角係灝灝..其實係一個小型補祝會啦..因為正日我地過左韓國,事前已經應承左灝灝同佢補祝,今次我地去主角屋企玩 , 當然有我既寶貝女katie啦

兩個小朋友見到D野食口水流 ..灝灝坐定定 , 為食既Katie忍唔住手要食喇..哈哈..好開心

好耐無咁聚過喇..呢個生日會仲比左個機會我地三個傾密計添

灝灝媽仲攪笑..話katie都係7月生日,所以當一齊再切蛋糕..哈哈 ..我地D mommy係咪少少傻? 為左小朋友開心咩都慶祝一餐。上面一杯杯好可愛既又係wing姨媽做架..好有心思

呢個係WING姨媽出品既 芒果布丁糯米滋..新口味..有驚喜又好味丫

Happy Birthday to you..祝兩位小朋友健康、快樂!

小朋友心諗做咩成日有蛋糕切?

金小姐又玩出位..唔望鏡頭..好想key番你個正面上去丫!

灝灝媽快D追多個女啦 ... 成個"好"字丫

全日兩個都玩到成間屋反轉..滿地玩具

差唔多要走喇..灝灝好怕羞咁鍚左KATIE一啖 ..可惜今次到KATIE扮高竇..睇下佢個表情幾扮野

翌日灝灝媽講番我知原來當晚送我地上車後 , 灝灝喊到返屋企丫..唔捨得KATIE妹妹喎..哈哈..小朋友真係好得意..玩時又要爭下..一玩熟左就唔捨得分開..唔緊要啦好快我地又見面喇。

韓國生日會 -- Last Day 明洞遊

呢度就係旅遊景點之一既明洞 , 似我地香港既銅鑼灣

後面尖頂果個係Seoul Tower

金先生好識做喎..知老婆仔要最後一擊shopping, 帶katie 行開玩

真係唔好意思..行到katie肚餓都係食住蛋糕頂肚,好彩佢都食得好滋味

行到累去嘆個雪糕先..甜野係金先生既最愛

呢間鋪頭既雪糕蛋糕好靚..藝術品一樣

行完街街又要準備去機場返香港lu..真係好唔捨得..9天旅程過得實在太快..下次又黎又會幾時呢?

韓國生日會 -- 夜遊東大門

去到Seoul 我地先到酒店check in , 因為約了brian既表哥食晚飯..於是我地決定休息一會再出發 , 最攪笑係我地搵到一台做緊"逃學威龍" 我地又重溫一次!

跟表哥食完飯約九時多..但我地都堅決要去東大門shopping , 因為過左12:30am就冇地鐵,我地預左一定趕唔切尾車,所以諗定要搭的士返酒店了,仲好慢慢行

由市中心坐地鐵去東大門要40mins ..你睇個路線圖眼都花

坐地鐵攪攪振既katie 玩到捐入daddy件衫到 ,攪到人人都笑佢 .. 不久katie又開始眼訓了,一睇錶已是十點...可憐既小朋友為左滿足我地既shopping 慾唯有忍耐一晚咁多啦

街頭好多檔攤應有盡有 , 仲有好多小食..太多了唔可影晒咁多樣 , 唯有影低我地食過既 ..尼個煎飯糰真係好好味丫..我相信wing姨媽一樣好掛住尼幾款

因為一到步katie就訓左, 我由出發抱佢抱到2:00am..因為太多野行喇..好奇怪shopping時真係唔記得"累" 女人shopping真係忘我既..最緊要有得行街街..但返到酒店我就覺得腳板好似裂開咁痛..

韓國生日會 -- 捨不得你

13號我地離開光洲坐內陸機返seoul玩兩日 , 食完早餐就拾好行李由爺爺麻麻送我地去機場, 兩位老人家好唔捨得katie丫..我見佢地好幾次少少眼濕濕,我個心都有D酸..心想唔緊要啦好快又見面

老爺千叮萬屬我地要好好照顧小孫女,到步要第一時間報平安

BYEBYE喇.. 保重丫

玩到咁上下又開始搵我..我遮住睇你點搵..呵呵

人仔細細就有兩地既PASSPORT

呢位係?? 祖兒?? 唔係...係一位空中小姐..BRIAN話佢好似容祖兒...又真係好似喎..

韓國生日會 -- 現場直擊

7/11 終於到左1歲生日既大日子喇 , 係屋企首之試穿韓服 , 除左袖長左少少 其餘都好岩身喎..

party 6:00pm才開始 , 而我亦要去扮靚靚 , 正準備出發時金小姐訓著左..正心大心細整唔整醒佢好 , 金先生竟然叫我地放心去扮靚 , 佢會好好看顧katie , 哇...大家都同一番說話 " 小心D丫 , 睇實佢丫" 佢又好有信心咁回答OK! 冇問題 ,好啦 , 信佢一次啦!

係我扮靚途中好怕聽到電話嚮 ,怕金小姐醒左扭計失控,點知差唔多兩小時後我地返到屋企好平靜喎...原來金先生好細心咁陪個女玩煮飯仔,佢話我地出左門口10mins就起左身 , 同個女睇卡通片,玩煮飯仔,最大獲係話金小姐開左大! 下? 我一聽到第一時間險查下清理完唔完善! 哇!!! 果然有驚喜~ 金先生再唔係大細路daddy,學會湊女喇..有進步!

會場係 Shin Yang Park Hotel , 呢個就係我地金小姐既生日場地佈置,以粉紅色及氣球為主 ,BUFFET形式進餐 ! 嘉賓約三十多人..金先見到好耐無見既老友仲講不停

氣氛十足既靚靚三層蛋糕

見到成個場都好多波波,KATIE顯得好興奮

不停玩台上既擺設

係度搵野食??

大合唱生日歌後,切蛋糕時刻

傳統環節

小朋友自行取當中既物件,傳說可代未將來去向

唔理係真係假都好KATIE都好醒目 , 第一次取到筆 , 第二次取聽筒,意思是會讀好多書,做醫生..開心得爺爺麻麻笑到見牙唔見眼..事前係屋企姑姐有訓練過..不過係教佢取$$ ..哈哈..好彩KATIE識做

姨媽好落力食食食..招呼唔到喇

奶奶既朋友好鐘意同KATIE玩,好彩KATIE識睇場面無扭計

金先生既老友一樣嘗面參加KATIE既生日派對,多謝多謝

開餐喇..KATIE好似好肚餓咁 , 一見到個餐包就大啖大啖食

妹妹好醒目知我冇時間去影下食物, 一早同我影定一部份同大家分享

到散場我同妹妹都不忘帶番兩隻大豬返屋企留念..哈哈 ..Katie生日禮物亦不少收獲..滿載而歸

韓國生日會 -- PIZZA屋小聚

金小姐做咩咁高興? 因為我地去左PIZZA屋同DADDY D老友食PIZZA丫.. 佢地好想見下金小姐喎 (見識下佢有幾八厭)

未黎主菜KATIE已經先嘆番餐飽 .. 可惜跌完一隻又一隻..攪到個地下好似打仗黎咁

拌碟既青瓜都唔放過

海鮮PIZZA

香草海鮮意粉 , 見唔見到旁邊都係有指定既KIMCHI? 哈哈 ..其實食咩餐都會見到..可惜顧住看牛,唔記得再影其他野食同大家分享

外賣PACKING? 靚嗎?

韓國生日會 -- 朋友飯局

左邊位靚女係 Sor-he,我地既好朋友 , 上兩年見佢時已經成為好好朋友,因為佢好nice好可愛 ,今次見佢知道佢已經成為一間畫廊既教長..真係好叻女! 另一位係金先生既老友 ,我成日覺得佢好似火頭爸B

Katie 見到靚女真係唔同D , 靚女抱抱冇問題

主菜板燒豬肋

辣撈麵

Katie好合作 , 自已係後面玩 ..睇下佢擺晒pose咁望我住地

大合照後再轉場去姨媽既酒吧傾下計..金小姐年紀小小就去蒲喇

睇緊咩眼定定? 咪就係聽緊注場歌手唱歌囉 .. 聽到第二首開始拍手 , 第三首係台上跳埋舞..笑死佢地

韓國生日會 -- 買玩具篇

尼個係Katie既shopping時間 , 行到玩具部突然要扭自已落地行..原來有原因既..佢見到好多玩具..要玩一番.. 睇下佢周圍走先已揀玩具..好似知有老婿咁

波波怪..一見到波就瘋狂..同我鐘意波點野有得揮

尼個唔好..再揀下先

我好鐘意尼個kitty 波波池丫...忍唔住都要跳入去影張相 ... 雖然麻麻話買..但我諗清楚都係唔好..因為仲有幾日就返香港..無謂晒錢錢啦..不過依家有d後悔無買..太靚喇

我地話尼個係chloe..哈哈

係e-mart crazy shopping既 wing姨媽 , 一大收獲

韓國生日會 -- Miss Korea ?

點解咁開心? 因為...........

Daddy 正為金小姐做Kiss Korea 帶..( katie 個動作好似話daddy 傻傻地咁)

另一邊攪手WING姨媽仲贈佢斗薘 , 金小姐一指箭咁行..好投入喎

宣佈冠軍喇...就係金小姐..YEAH..

開心得滯谷爆左添

韓國生日會 -- Mommy Hand Made Kimbip

一早起床永遠都係見到mommy係廚房準備早餐 , 而今日佢做左kimbip(韓式飯團)

唔好以為好簡單 , 其實都好勁功父 , 蛋白同蛋黃分開煎成蛋皮,反果下我成日整得唔靚..但mommy 一下反手就掂左

等左好多既katie急不及待想偷食喇..呵呵

卷起未切既樣

試食時間....

尼份就係我地既豐富早餐喇

韓國生日會 -- 陽光浴

Katie 第一次嘗試係騎樓享受光陽下的浸浴 .. 睇佢幾開心

韓國生日會 -- 湖南觀光

坐觀光貓巴士去遊覽梧桐島

海風一陣陣 , katie訓著左

國立公園地圖

觀光塔,可以365度睇到梧島全景

尼樣明明叫金先生要扮到好溫韾咁一家三口睇海景 , 點知佢又玩野整古做怪..兩父女都唔合作既

落返觀光塔就可以行到尼個地方..好似我地香港既石澳..一時又諗到樣野玩..就係同金先生重演影婚紗照既攪笑POSE..

笑爆咀..連老爺地都玩埋一份

Katie會唔會笑daddy , mommy大唔透?

天氣雖然好熱 , 但我都好享受尼個旅程 , 開頭一見到要行一段山路都有D頭痛 , 但行行下去到海邊真係好舒服  ..出一身汗感覺好好.. katie 都唔怕熱見到水池有得玩水不知幾開心

韓國生日會 -- 探訪姨丈

去到姨丈既小學 ，好似katie去考入學試咁 ..

肚仔餓既KATIE要借校長室一用食奶奶 , 睇下佢幾沙塵

個位好好坐架..但都唔易坐到 ..呵呵

學生飯堂 , 後面D亞姨正準備午餐

離開左學校我地同姨丈去左附近既烤魚專門店食LUNCH , 上面就係前菜

亞朱媽會幫手燒魚,剪件

同樣搵生菜包住配料食..YUMMY

AR~ YUMYUM

韓國生日會 -- 到達 YEO-SU

幾經左轉加轉既山路終於到達YEO-SU , 真係有少少暈..因為實在太多灣了..好彩KATIE乖乖咁坐車 ..到達山頂落車睇到好靚既海景好舒服..MOMMY仲準備左水果即時品嘗..涼風一陣陣加上美麗如畫既風景..太妙了

我地既八寶箱 , 亦有專人服侍

橙色衫位大叔係邊個? 佢係電車男..係我地上山中途遇見問路的..佢好好人..知道我地唔太熟路就帶我地路.. 突然我覺得佢好似"我的野蠻女友"尾段果個來自未來既大叔咁.. 突然出現..再坐UFO走...唔通佢係我地既LUCKY STAR?

到左晚上八時多到達警察宿舍 , 大家都肚餓了 , MOMMY趕住準備晚餐 , 另一邊係房 , 有齊好多墊 " TATAME "

兩隻雞加水煲大滾 , 再加約20粒蒜頭加煲1.5小時.. 起初覺得好奇怪..加咁多蒜頭好食嗎? 一直在估MOMMY做咩菜..

食得了...原來係手撕雞..食法係雞肉沾少許海鹽 伴KIMCHI 食..真係好好好食 , 估唔到咁做D雞住隻都好滑好香 ..

到依家我都好想再食番..正正正.. 亞媽仲話煲完雞個湯底可以加米去煲雞撕粥做早餐..哇..mommy真係準備十足

早餐~ 我食左兩碗丫

晨早既宿舍外貌

海邊拍照留念

出發去姨丈學校拜訪...

韓國生日會 -- 出發YEO-SU 渡假兩天 (DAY1)

好靚既天空...駕車去YEO-SU 沿途風景 , 雖然車程上好幾小時,但沿路欣賞到好多好靚既山同藍天白雲

走了一小時多到了休息處來點小吃..門外仲有搖搖車比KATIE玩添

食市內有BB床,BB椅提供, 我將KATIE放床仔方便我食野時照顧到佢

wing姨媽叫既拉麵套餐..一開始好奇怪做咩跟白飯,可是轉頭白飯都唔見lu..哈哈 ..因為當地人好興食完個麵加白飯落湯做湯飯..又有一番風味呢..

再駕車多2小時到了這個歷史博物館..開頭都有D怕悶..歷史..但入到去睇都ok架..好多歷史模型一齊影下相幾得意

尼個係中國人為左被開地雷既臨時橋..想唔到可以點行..破破爛爛

Red Cross Center

Tank

嚇到KATIE要逃走

Katie 話 此地不宜久留 ..快d走喇

韓國生日會 -- 晚餐-烤五花腩

奶奶問想食乜?我一諗就想起好好味既烤五花腩 , 一黎自已想食,二黎想比wing e-mo 試下住家正宗韓燒..呢間就係豬肉店, 豬唔同部位分開包好放於廚櫃 , 整潔又衛生

除左豬肉外, 另一廚櫃仲有唔同kimchi任君選揀

韓國人食燒類一定會有生菜,芝麻葉,生蒜片,青辣椒 , bbq辣醬, 食時用一片生菜包上配料加一小塊肉片便可, 非常好吃!!

Katie 愛上了韓國生菜 , 因為韓國菜甜又冇嗅青味 ..食落好清新的

一開雪櫃就"哇..."一聲 ,因為好多野食 ..又試攪攪震

食飽飽跟爺爺嘆西瓜

韓國生日會 -- 新世界百貨公司shopping